KALIBO, Aklan—Haeos 80 porsyento eon nga nagbalik sa normal ro pagpangabuhi sa nasyon it Vietnam sa tunga it nagapadayun nga paeag it pandemya.
Suno kay Bombo International Correspondent Ira Villaruel Patricio it Ho Chi Minh City, Vietnam nga balik eon sa normal ro operasyon it mga negosyo ag establisyemento.
Maskin sigon ro mga eskwelahan hay nagbukas eon man kung siin ro face to face classes hay ginbalik eon umpisa ko Pebrero 7.
Matapos nga uman nga buksan it gobyerno ro International flight ko Pebrero 15, amat-amat eon nga nagtaas ro numero it mga dumeuo-o nga nagabisita sa andang nasyon.
Ginaeauman nga magadaea raya it positibo nga impact sa industriya it turismo nga eubos nga naapektuhan sa pagpanaeasa it COVID-19 pandemic.
Ginpahayag dugang nga plano it gobyerno nga buksan ro tanan nga border it nasyon sa Marso 15.
Sa makaron, hilway eon nga makagguwa ro mga pumueoyo kamana man nga owa eon it ginapatuman nga hugut nga sueondanan mag-eowas sa padayun nga pagsuksok it face mask.
Ginlaygayan man sigon ro tanan nga magkantigo nga magpangabuhi it normal kaibahan ro virus.
