KALIBO, Aklan—Uman nga gindumdom ni Lucy Francisco, Regional Chairperson Gabriela Women’s Organization ro mga makasueobo nga natabo antes ro pagpatigayun it EDSA People Power Revolution.
Suno kana, naging masalimuot ro kahimtangan it mga pumueoyo sa idaeom it rehimen ni dating Pangueong Ferdinand Marcos Sr. kung siin talamak ro panakawan ag korapsyon.
Ro EDSA People Power Revolution suno kana hay sangka non-violent revolution it masobra daywang milyon katawo nga nagtapos sa haeos daywang dekada nga pagpungko sa pwesto ni Marcos ag nagpabanhaw it demokrasyon it nasyon.
Ro rebolusyon hay gintutukan it mga nasyon ag ginkakibot it bilog nga kalibutan.
Kabay suno kana nga buhi pa gihapon ro espiritu it sangka maisog nga Filipino nga haum nga maghugpong para abuton ro handom nga sangka mainuswagon ag malinong nga nasyon.
Kun owa sigon ro EDSA People Power Revolution owa it kahilwayan nga gina-enjoy ro mga pamatan-on sa makaron.
