KALIBO, Aklan—Eubusan eon nga ginbuoe it gobyerno it United Kingdom ro tanan nga legal restrictions angot sa COVID-19 umpisa makaron nga adlaw, Pebrero 23.
Buot hambaeon kara indi eon kinahang-ean it mga pumueoyo nga magsusksok it face mask sa kada pagguwa it baeay ukon pagsueod it establisyemento kamana man nga owa eon it ginapatuman nga physical distancing ag isolation.
Suno kay Bombo International Correspondent Jay Garmino it London, United Kingdom nga sanda ro kauna-unahang nasyon sa bilog nga kalibutan nga nagbuoe it tanan nga mga restrictions kung siin ginakabig nanda raya bilang “freedom day”.
Ro naging basehan sigon it gobyerno sa pag-lift it mga legal restrictions hay ro manaba nga numero it hospitalization rate, severe infections ag fatality.
Raya hay sa pihak nga naga-average gihapon ro UK it masobra 20,000 hasta 30,000 nga kaso it COVID-19 kada adlaw.
Nagapati si Garmino nga maidid nga gin-estudyuhan it gobyerno ro nasambit nga desisyon ag ginbalanse ro ekonimya ag ikaayong eawas it publiko.
Sa pihak nga parte, positibo man ro mga pumueoyo it Brintanya nga insigidang maka-recover si Queen Elizabeth matapos tamaan it virus.
Mabahoe man ro andang pagpasaeamat nga mild eamang ro sintomas it Reyna kung siin presente imaw nga naka-isolate Windsor Castle.
