KALIBO, Aklan—Ginplastar eon it Inter-Agency Task Force (IATF) ro gin-amyendahang metrics para sa pagtaeana it COVID-19 alert level system sa nasyon.
Raya hay matapos nga talakayon kahapon ro mga rekomendasyon it technical working group ag gintaeana it IATF ro cut-off para sa average daily attack rate (ADAR) nga indi magnaba sa an-om para sa low risk; an-om hasta 18 para sa moderate risk samtang 18 pataas para sa high risk.
Suno kay Acting Presidential Spokesman Karlo Nograles, magapadayun ro paggamit it cross-tabulation sa klasipikasyon it mga kaso ag COVID-19 bed utilization.
Posible man sigon nga ipanaog sa alert level 1 ro mabahoe nga parte it syudad ag independent component city kung naabot ro sueondahanan nga ginplastar it IATF.
Magiging epektibo man ro bag-ong metric umpisa Marso 1.
