KALIBO, Aklan—Gin-tiketan ro mga pasaway nga e-trike drivers nga nagapili it pasahero nga ginapasakay.
Raya ro ginpahayag ni Ryan Tubi, OIC chief it Malay Transportation Office.
Suno kana nga matapos nga mabaton ro reklamo it mga commuters ko nagtaliwan nga domingo hay insigida sanda nga nagpatigayon it operasyon ag natigayon nga matumod ro mga ginareklamo nga driver.
Madumduman nga sangka pasahero ro nagpaabot it reklamo ag gin-post pa sa social media ro kaeain it buot matapos nga gina-alegar nga ginpapanaog it driver kat makakita it sangka grupo it mga pasahero.
Kaeabanan sigon nga bayolasyon it mga drivers sa boracay hay ro refusal to convey passengers, overcharging ukon sobrang pagsukot it pamasahe ag ro pagpapanaog it pasahero.
Ro minimum fare sigon makaron sa isla hay 15 pesos halin sa 10 pesos bangud sa limitadong pasahero nga an-um tuga it pandemya.
Sa 10 nga complaints nga nabaton sa uman nga pagbuhos it mga bisita sa isla hay tanan sigon raya hay nataw-an it aksyon.
Padayun man ro andang clearing operation kontra sa mga naga obstruct sa daeanon.
Sa makaron hay may kabilugan nga masobra sa 440 nga e-trikes nga nagabiyahe sa Boracay.
May nakapending pa sigon nga applicant nga masobra sa 100.
