KALIBO, Aklan—Ro lupus hay isaeang ka chronic autoimmune disease.
Raya hay nagakahueugan nga ro lupus hay isaeang ka pangmabuhayan nga kondisyon kun sa siin hay ginakontra it kaugalingon nga immune system ro nagkaeain eain nga parte it kaeawasan.
Nasayuran nga sa normal nga kondisyon, ro immune system dapat ro nagprotekta sa kaeawasan.
Apang kung may autoimmune disease, ro immune system hay nagiging eubos nga aktibo rason man nga maging ro mga kaugalingon nga parte it kaeawasan hay naapektuhan kara.
Suno kay Dr. Glenford Refre, sangka Internist-pulmonologist nga kung ro sangka tawo hay makaangkon it lupus, puweding maapektuhan ro anang pilang parte it kaeawasan.
Puwedi nga maapektuhan ro mga kasu-kasuan, panit, mga kidney ukon bato, aeagyan it dugo, utok, tagipusuon, ag mga baga.
Sambilog sa mga nagapangunang sintomas it lupus hay ro pagkaangkon it horma nga medyo alimbangbang nga pantal ukon butterfly rash sa itsura.
Mag-euwas kara, puwedi man nga makaexperiensya ro pasyente it grabe nga pagkagaoy ag eagnat.
Hasta makarun hay owa pa eubusan nga nasayuran it mga doktor kung ham-an nga nakakaangkon it mga autoimmune disease nga kapareho it lupus.
Apang maabo man ro nagapati nga raya hay bangud sa pagkamana it mga problemadong genes, pati eun ro nagkaeain eain nga mga masakit sa palibot.
Agud nga mabueong ro mga sintomas it lupus, ro pasyente hay puweding taw-an it nagkaeain eain nga bueong kapareho it mga non-steroidal anti-inflammatory drug, steroid, antimalarial drug, disease-modifying anti-rheumatic drug, biologic therapy, anti-hypertensive drug, ag maaabo pang iba.
