KALIBO, Aklan—Bangud nga minimal eon ro risk classification it bilog nga probinsiya it Aklan rason nga ginhaeugaan ro alert level halin sa alert level 2 paagto sa 1 umpisa Marso 1.
Suno kay Dr. Cornelio Cuatchon Jr. it provincial health office ukon PHO-Aklan nga nagmayad eon ro sitwasyon it COVID-19 pandemic sa probinsiya kun sa siin ro total bed utilization rate sa mga ospital hay less than 60% eon lang.
Mag-eowas kara, mataas eon ro vaccination rate it adult population ag nag-abot eon sa haeos 70%.
Gindugang pa ni Dr. Cuatchon nga magasueod eon kita sa new normal.
Sa idaeum it alert level 1, ginapasugtan ro intrazonal ag interzonal travel nga owa it ginapili nga edad ag comorbidities, tanan nga establishments, mga tawo ukon aktibidad hay ginapasugtan nga mag operate ag magtrabaho.
Hilway eon ro tanan nga magpatigayon it mabahoe nga pagtililipon, magpamasyar, ag magtumpukan sa mga public places.
Haeos full capacity eon ro public transportation ukon pagaboe-on eon ro restrictions sa pagbiyahe, apang padayun nga igapatuman ro pagsuksok it facemask ag physical distancing.
Ro guidelines para sa bag-ong risk classification hay nakabaehag sa executive order ni Aklan Governor Florencio Miraflores.
