KALIBO, Aklan—Bukas ro pamunuan it Banga-Kalibo Jeepney Transport Service Cooperative nga makaangkon it adjustment sa presyo it pamsahe ro mga multicab nga may biyaheng Banga-Kalibo vice versa kasunod it pagpatuman it 100 percent seating capacity sa pampublikong saeakyan.
Raya hay matapos nga maeakip ro probinsya it Aklan sa mga lugar nga ginpaidaeom sa alert level 1 status ukon new normal umpisa Marso 1 hasta 15, 2022.
Suno kay Mr. Leandro Lenciano, Chairman it Banga-Kalibo Jeepney Transport Service Cooperative nga ginakalipay nanda ro amat-amat nga pagbalik sa normal it sitwasyon sa pihak it padayun nga pagpanaeasa it pandemya.
Sa oras sigon nga magbalik eon ro face to face classes sa tanan nga lebel hay posibleng makabawi eon sanda halin sa epekto it pandemya.
Nasayuran nga maabu nga mga driver ro naga-antus bangud sa padayun nga pagtaas it presyo it petrolyo sa nasyon.
Nagapati si Lenciano nga kinahang-ean nga ibutang sa tama nga proseso ro tanan eabi eon ro panueoktan sa pamasahe kung siin dapat nga maging paborable sa parehong driver ag commuter.
Sa makaron, nagapabilin sa P20 ro andang sukot sa regular passenger samtang P15 man para sa mga estudyante, PWD ag senior citizen.
