KALIBO, Aklan—Maga-arangkada eon ro motorcade it mga fire truck ag firefighters it Bureau of Fire Protection (BFP)-Kalibo pasado alas-6:00 hin-aga it agahon.
Kasunod raya it pagsueod it buean it Marso bilang fire prevention month.
Ro kick-off ceremony ukon paglunsar it Fire Prevention Month hay pagasundan it matag-od nga programa ag pagtao it token sa mga volunteer group.
Gin-abisuhan man ro publiko nga indi magkabaeaka engkaso nga makabati it tunog it ‘serena’ bangud kaparte raya it kick-off ceremony.
Suno kay Senior Fire Inspector Arden Bedoña it BFP-Kalibo nga tuyo it aktibidad nga pabaskugon ro fire safety awareness campaign eabi eon makaron nga buean it Marso kung siin masami nga nakakaangkon it maabu nga insidente it sunog.
Kinahang-ean sigon nga mapukaw ro igtueopangod it publiko para magdahan ag malikawan ro sunog eabi eon kun mainit ro tyempo.
Samtang, maga-umpisa man ro virtual launching it fire prevention month it alas-11:00 it agahon.
Makit-an sigon raya sa facebook page it BFP-Kalibo kamana man nga may gin-provide sanda short video clips angot sa fire safety tips ag basic medical response para makaangkon it kasayuran ro publiko sa kun ano ro pwedeng ubrahon engkaso nga makaangkon it sunog.
Ginpahayag pa ni Bedoña nga kaeabanan nga nagiging rason it sunog hay “human error”.
Sa pihak kara, nakalista eamang it tatlong ka mga insidente it sunog ro taeatapan umpisa Enero hasta Pebrero 2022 kung siin 60 porsyento raya nga mas manaba kung igakumpara sa kaparehong tyempo ko nagtaliwan nga dag-on.
