KALIBO, Aklan—Nadugangan pa ro eskwelahan sa probinsiya it Aklan nga nagpasakop para sa expanded face-to-face classes.
Suno kay Dr. Miguel Mac Aposin, Schools Division Superintendent it Department of Education ukon DepEd-Aklan nga nagpatigayon it in-person classes makaron nga adlaw it Lunes, Marso 7, ro Dapdap Elementary School sa banwa it Tangalan umpisa Grade 1 hasta 6.
Ko nagtaliwan nga Lunes hay nag-umpisa eon man it klase ro buruanga elementary school; maloco national high school ag malinao school for philippine craftsmen.
Gindugang pa ni Dr. Aposin nga maabu pa makaron nga mga eskwelahan sa aklan ro nagapaidaeum man sa validation ag simulation kasunod it pagpaidaeum sa probinsiya sa Alert level 1.
Sa regional office eon lang sigon makaron ro approval sa oras nga makompleto it mga eskwelahan ro andang requirements sa idaeum it School Safety Assessment Tool nga gina-validate anay it Schools Division Office.
Samtang, bukon suno kana it mandatory ro pagpabakuna it mga inunga, apang first choice ro vaccinated sa face to face classes.
Haeos tanan eon man sigon nga nanda mga manugturo hay bakunado eon, kun sa siin, required sa mga nagapasakop sa in- person classes ro fully vaccinated.
