KALIBO, Aklan—Nabaton eon it ap-at ka mga Local Government Unit sa probinsya it Aklan ro gintao nga Patient Transport Vehicle it Philippine Charity Sweepstakes Office (PCSO) matapos ro ginpatigayun nga turnover ceremony sa Cebu ko Marso 4.
Ginakaeakipan raya it munisipalidad it Kalibo, Ibajay, Tangalan ag Libacao.
Suno kay Financial Management Officer 1 John Martin Alipao it PCSO-Aklan nga ginpangunahan ni General Manager Royina Marzan Garman ro seremonya kung siin personal man nga nagtambong ro alkalde it nasambit nga mga banwa.
Ro kada unit it Patient Transport Vehicle hay nagabalor it P1,989,000 ag may kaibahan pa nga wheelchair ag basic equipment.
Maidid sigon nga ginsikyar ro tanan nga mga dokumento ag requirements antes gintaw-an it clearance ro natungdan nga mga LGU para mabuoe ro behikulo.
Gin-engganyo man ni Alipao ro iba pang LGU nga gustong mag-avail nga makipag-coordinate sa andang opisina para makaibahan sa mga iga-rekomenda bangud may paga-eauman pa nga masunod nga batch nga iga-procure ro PCSO.
Sa pihak nga parte, nagapadayun sigon ro medical assistance program it taeatapan ag nagapabilin nga available ro PCSO desk sa Malasakit Center nga nahamtang sa Aklan Provincial Hospital.
