Eubusan eon nga nagtaas ro panibag-ong bigtime nga pagtaas sa presyo sa petrolyo.
Paandam it mga natungdan, bukon pa it raya ro ulihi bangud nga sa masunod nga domingo hay may ginaeauman nga pagtaas nga posibleng mag-abot sa napueong piso kada litro.
Sa pihak kara, sa atubang it nagakatabu nga non-stop oil price hike, ginpasiguro man it gobyerno nga owa pa it paghueag sa sukot sa pamasahe ag sa presyo it mga nagapangunang baeak-eon.
Suno Department of Trade and Industry (DTI), tatlong buean pa pwedeng maghueag ro presyo it mga baeak-eon ag sukot sa serbisyo.
Maskin nga may mga napabalita nga nagsarili eon it pagpataas it pamasahe ro pilang driver ag may pilang baligya man ro nagmahae.
Rason nga ro panawagan makaron sa mga pumueuyu nga bantayan ro posibleng illegal nga pagpataas it presyo kaibahan man ro hoarding ukon pagtambak it mga produkto it mga abusadong negosyante.
Style nanda nga magtago it mga produkto ag dayun nga igapaguwa kon mataas eon ro presyuhan.
Rason nga insigida sanda nga isgugid sa DTI ag sa Department of Agriculture (DA) agud nga mapasabat sa RA 7581 ukon ro Price Act nga nagapatong it multa ag iba pang penalidad sa mga magamanipula it presyo it mga baeak-eon.
Pare-pareho kita nga apektado it mga pagtaas-presyo, dapat eang nga maging parehas sa away, indi magpamentaha ag indi maging abusado!
