KALIBO, Aklan—Batyag eon man sa Amerika ro pagsirit it presyo it langis.
Suno kay Bombo International Correspondent Greg Aguilar it California, USA nga raya hay sa pihak nga ro US ro pinakamabahoe nga producer it crude oil sa bilog nga kalibutan kasunod it Saudi Arabia ag Russia.
Haeos 90 % sigon it andang ginaproduce nga krudo hay sanda mismo ro naga-konsumo.
Bangud sigon sa sanctions nga ginpapanaog sa Russia rason nga maabu nga mga nasyon ro nagalikaw nga magbakae idtu it natural gas ag iba pang produktong petrolyo.
Sa makaron hay padayun suno kana ro pakikipag-istorya ni US president Joe Biden sa Saudi Arabia, United Arab Emirates, Iran, Venezuela ag iba pang kaalyadong nasyon para sa dugang nga supply it produktong petrolyo agud nga mapahagan-hagan ro presyo kara sa bilog nga kalibutan.
Apang parehong miyembro sigon it saudi arabia ag UAE ro Russia sa Organization of the Petroleum Exporting Countries ukon OPEC rason nga nagapanimbang sanda nga makaangkon it excess ukon magpasobra sa andang produce bangud sa posibleng maging response it Russia.
Dati suno kana ro presyo it crude oil hay 70 dollars per barrel apang makataliwan ro haeos sang buean hay nag doble raya sa 130 dollars.
Haeos tanan nga bagay suno kana hay nakadepende sa crude oil bangud nga dikara ginabo-oe ro regular nga gasoline, diesel ag iba pa rason nga kon magtaas ro presyo hay haeos nagasaka man ro tanan.
