KALIBO, Aklan—Nagahirit makaron ro mga tricycle drivers and operators sa Poblacion, Kalibo nga amyendahan ro ginapatuman nga Municipal Ordinance No. 2022-055, ag paga sundon ro dating Municipal Ordinance No. 2020-019.
Raya hay kaangtanan sa panueuktan it pamasahe sa atubang it sunud-sunod nga pagtaas it presyo it produktong petrolyo.
Suno kay Gervy Ibarra, presidente it Kalibo Poblacion Tricycle Operators Drivers Association ukon KAPOTODA nga sa ginpatigayon nga emergency meeting ko Biyernes nga adlaw kaibahan ro iba pang tricycle associations sa banwa it Kalibo, gusto nanda nga ipabilin sa P10 ro pamasahe sa sueod it barangay poblacion ag dugang nga limang piso ukon P15 pesos pag abot sa Roxas Avenue Extension, Eastern Terminal, Jaime Cardinal Sin Avenue, SSS Office ag Capitol Site.
Magatau sigon sanda it daywang piso nga discount sa senior citizens, PWDs ag estudyante.
Ginrason pa ni Ibarra nga haeos tanan nga TODA hay pabor sa nasambit nga proposisyon.
Ginpahayag dugang nga haeos P75 hasta P80 eon ro presyo it gasolina makaron kada litro rason nga apektado ag owa eon sanda it haeos nga ginakita.
Ro nasambit nga rekomendasyun hay nakataeana pa nga pagatalakayon it barangay council antes nga ipasaka sa Sangguniang Bayan.
