KALIBO, Aklan—Gin-umpisahan eon it pilang pribadong kolehiyo sa probinsya it Aklan ro uman nga pagpatigayun it limited face-to-face classes matapos nga pasugtan eon raya it Inter-Agency Task Force (IATF) sa mga lugar nga ginpaidaeom sa Alert Level 1.
Suno kay Dr. Rebecca Tandog, Vice Presient For Academic Affairs it Northwestern Visayas Colleges (NVC) nga kapin sa 300 hasta 400 nga mga estudyante ro nagpartisipar sa pilot testing it limited face to face classes sa nasambit nga eskwelahan.
Ginapahayag nga limitado eamang ro mga kurso ag subject nga ginbuksan.
Sa idaeom it Alert level 1, ginpasugtan ro 100 percent capacity nga makasueod sa sangka classroom kung siin hugut nga ginasunod ro health and safety protocols kapareho it physical distancing ag pagsuksok it face mask it mga estudyante, manugturo ag iba pang staff it pasilidad.
Dugang pa ni Dr. Tandog nga padayun gihapon ro modular learning apisar nga may limited face-to-face classes eon.
Tuyo eamang kara nga makaeagas ro mga estudyante sa iba pa nandang aktibidad eabi eon sa mga actual learning performances.
Samtang, owa sigon ginapasugtan ro mga estudyante nga magsueod sa eskwelahan kung bukon it bakunado.
Raya hay base sa ginpagguwa nga sueondanan it Commission on Higher Education (CHED) sa mga eskwelahan nga nagapatigayun it limited face to face classes.
