KALIBO, Aklan—Opisyal eon nga ginlunsar it gobyerno probinsyal ro Aklan Agri-Aqua demonstration farm and training center sa Brgy. Nalook, Kalibo kahapon, Marso 21.
Suno kay Sangguniang Panlalawigan member Soviet Russia Dela Cruz, naga-operate eon ro Aklan Grains and Processing Center kung siin mabahoe ro maibulig kara sa mga lokal nga mangunguma.
Tuyo sigon kara nga suportahan ro produksyon it mga mangunguma ag masiguro nga indi sanda malugi.
Ro paeay nga eabtong hay sarang mabakae it P15 kada kilo samtang ro uga hay P19.
Ro pasilidad hay may drying ag milling area nga sarang maka-akomodar sa gina-ani nga paeay it mga rice farmer.
Sa pihak nga parte, tuyo man it gintukod nga training center nga makapatigayun it nagakaigo nga training sa mga fisher folks, farmers ag iba pang stakeholders para ma-improbar ro andang produksyon.
Sa makaron hay nagapadayun pa ro konstruksyon it dormitory ag ginaeauman nga matapos eon raya sa masunod nga buean.
Samtang, natigayun eon man nga maipanupod ro pilang ka mga farm machineries sa mga famers association sa bilog nga probinsya it Aklan.
