KALIBO, Aklan—Ginpaathag ni Atty. Janmar Barrios nga ro nagpautang nga OFW nga si Anne Audrey hay pwedeng magpasaka it small claims.
Raya suno kana hay sangka pamaagi ukon proseso sa pagsukot it utang sa sangka tawo nga owa nagabayad sa anang obligasyon ag puro tug-an eamang.
Pwedeng i-file ro kaso sa lugar mismo it tawong nagapautang ag pwede man sa lugar it tawong nag-utang partikular sa municipal trial court.
Kinahangean nga makabo-oe it small claims form ag mga nagakaigo nga ebidensiya.
Apang medyu mabudlay sigon ro anang sitwasyon bangud nga idtu imaw sa maeayo nga lugar partikular sa Kuwait.
Sa pihak nga parte, gindugang pa ni Atty. Barrios nga pwedeng makaangkon it problema kun i-post ro pagsukot it utang sa social media ag may kaibahan pa nga mga maeain nga tinaga.
Kon ro gina-post suno kana hay nakakasamad sa pagkatawo ukon makabig nga paninirang puri hay pwedeng makasuhan it cyberlibel sa idaeum it Republic Act No. 10175 ukon “Cybercrime Prevention Act of 2012”.
