KALIBO, Aklan–Haeos nagakaubusan eon it suplay it mga karne it baboy sa pilang ka mga merkado publiko sa probinsya it Aklan.
Suno kay Melchor Parce, sangka meat vendor sa Kalibo Public Market nga owa eon haeos it mabakae nga buhi nga baboy sa mga kabaryuhan.
Raya sigon ro rason kung ham-an umabot eon sa P260 ro presyo it kada kilo it pigi, kasim, pork chop ag liempo.
Owa sigon sanda it mahimo kundi magsunod sa daeagan it presyo bangud nagahampang eon sa P165 hasta P170 ro baeak-an it kada kilo sa buhi nga baboy.
Indi sigon sanda pwedeng magpanaba it presyo bangud posibleng magresulta raya it kalugian kanda.
Mag-euwas kara, mas pang naging mainit ro kompetisyon sa pagbakae it buhi nga baboy rason nga kinahang-ean tupungan ro ginatanyag nga presyo agud nga may maibaligya sanda nga karne.
