KALIBO, Aklan–Gin-engganyo it Department of Education ukon DepEd-Aklan ro mga ginikanan it mga estudyante nga magasueod sa Kindergarten, Grades 1, 7, ag 11 sa mga pampublikong eskwelahan nga magpasakop sa early registration activity nga nag-umpisa makaron nga adlaw it Biyernes, Marso 25 ag magabuhay hasta Abril 30, 2022 sa para sa School Year 2022-2023.
Suno kay Dr. Miguel Mac Aposin, schools division superintendent it DepEd-Aklan nga tuyo kara nga mataw-an it kahigayunan ro andang taeatapan nga makapatigayon it nagakaigo nga pagpahaum ag adjustments sa andang mga plano para sa masunod nga school year.
Pila suno kana ro mga requirements hay ro birth certificate , apang mas importante sigon nga makapalista anay.
Bangud nga ro Aklan suno kana hay nakapaidaeum eon sa Alert Level 1, pwede eon nga makapatigayon it in-person registration apang kinahangean sa gihapon nga masunod ro physical distancing ag health and safety protocols agud nga malikawan ro posibleng pagtaeapnan it COVID-19.
Samtang, bangud nga may una gihapon nga pandemya, posible suno kana nga makaangkon it blended learning pinaagi sa limited face to face classes ag paggamit it module ukon modular learning.
Magasara sigon ro klase para sa School Year 2021-2022 sa Hunyo 24.
