KALIBO, Aklan–Ginpasakupan it haeos bilog nga kalibutan ro dag-unan nga Earth Hour makaron nga gabi-.
Kada dag-on, milyon-milyon nga mga pumueoyo ag establisyemento ro nagapartisipar sa sang oras nga aktibidad.
Suno kay Engr. Valentin Teodosio it Aklan Environment and National Resources Office (AKENRO), ro pagpatigayun it Earth Hour hay sangka pamaagi it pagtao it pag-ulikid sa palibot eabi eon sa nagakatabo nga climate change.
Ro Earth Hour hay nakasentro sa krisis sa klima apang kan-o eamang hay gintinguhaan kara nga i-eakip ro isyu angot sa madasig nga pagkaduea it kalikasan.
Ro Earth Hour hay nag-umwad ag mas nagbahoe agud nga maging sambilog sa pinakamabahoe nga paghueag it grassroots sa bilog nga kalibutan para sa pag-amlig sa palibot nga nagatau it inspirasyon sa mga indibidwal, komunidad, negosyo ag grupo sa masobra sa 180 nga mga nasyon ag teritoryo.
Madumduman nga kaibahan ro Pilipinas sa mga nagpromisa sa United Nations Framework Convention on Climate Change nga magabawas raya it greenhouse gas emissions it hasta 75% halin 2020 hasta 2030.
Samtang, na-obserbahan man iya sa pilang lugar sa probinsya it Aklan ro pakikibuylog it pilang indibidwal ag establisyemento sa earth hour.
