Ginpanindugan it China ro andang sovereign rights sa Scarborough ukon Panatag Shoal matapos nga ginreport it Philippine Coast Guard (PCG) ro “close distance maneuvering” incident nga ginakaeakipan it Chinese vessel sa area.
Ginhimo ni Foreign Ministry spokesman Wang Wenbin ro pahayag kasunod it report it PCG ko Marso 2 nga gin-eapitan it Chinese Coast Guard Vessel ro BRP Malabrigo sa kaeawran sa palibot it Panatag Shoal ukon mas kilaea bilang Bajo de Masinloc.
Kadungan kara hay gin-engganyo ni Wang ro PCG nga irespeto ro claim it China sa natungdan nga parte it kaeawran base sa mga naga-iral nga domestic law it Beijing ag international law.
Ginapalikaw man nanda ro PCG sa pagpasilabot sa pagpatrol ag law enforcement it Chinese Coast Guard sa nasambit nga lugar.
Apang, suno kay PCG Commandant Admiral Artemio Abu, ro insidente ko kan-o eamang hay pang-ap-at eon nga napabalita nga close distance maneuvering incident it mga barko it China sa palibot it Panatag Shoal.
