Maskin nga may ginaeauman eon man nga panibag-ong pagtaas sa presyo it produktong petrolyo, makabig sigon nga nagbalik eon ro kabaskog it ekonomiya sa Pilipinas.
Raya hay matapos ro daywang dag-on nga sa idaeum it COVID-19 pandemic ro nasyon.
Kadungan it paghaeuga sa alert level status sa mga nagtaliwan nga buean hay nakakabalik eon sa pre-pandemic volume ro kaabuon it tawo sa mga baealigyaan.
Padayun ro pagbaligya, nagbalik eon ro mga suki ag buhi eon man ro negosyo.
Sa pihak kara, ag bangud gihapon sa paeag it COVID , posibleng hasta nga matapos ro termino ni Pangueong Rodrigo Duterte magabuhay ro Alert Level 1 sa nasyon.
Todo kayod man ro mga pumueuyu.
Tanan nga pwedeng mapangitan-an hay ginasueod eon.
Ro tanan hay gustong makabawi ag makabulig sa ekonomiya it nasyon.
Nakakabulig man ro mga programa, proyekto ag ayuda halin sa gobyerno ag pribadong sektor.
Kinahangean eamang nga maging positibo ro panan-awan ag eakipan it hugod agud nga ro atong pagtinguha hay indi eamang matapos sa pandemya kundi nga maga dere deretso sa pag-umwad para sa atong pamilya ag nasyon.
Masikin nga nag atubang kita sa grabeng krisis ag paeag , masarangan naton nga maeampasan ro tanan.
