KALIBO, Aklan–Mag-euwas sa sigidas nga pagtaas it presyo it produktong petrolyo, sambilog pa sa ginaproblemahan makaron it pilang jeepney operator ro kawad-an it aksyon it Land Transportation Franchising and Regulatory Board (LTFRB) angot sa ginatao nga fuel subsidy kung siin may pila kanda nga owa nakabaton.
Suno kay Salvador Berdonar, Jeepney driver/operator it Kalibo-Caticlan vice versa nga may pilang indibidwal nga dating nagapanag-iya it jeepney ro padayun nga nagabaton it ayuda halin sa gobyerno apisar nga ginbaligya eon ro andang unit.
Sambilog sigon imaw sa naka-eksperyensya kara bangud umpisa nga ginbakae nana ro nasambit nga unit ko Agosto 2019 hay owa gid imaw nakabaton it fuel subsidy.
Gintinguhaan man sigon nana nga istoryahon ro dating nagapanag-iya it behikulo nga si certain Virgilita Alamera para bue-on ro Pantawid Pasada Program (PPP) card apang napas-eawan imaw.
Ginpahayag dugang nga nagdangop man imaw sa taeatapan it LTFRB-6 para ipaabot ro andang problema apang owa sigon ginabaton ro deed of sale.
Kinahang-ean sigon nga ro magabuoe it panibag-ong card hay ro mismong tawo nga nakapangaean sa natungdan nga unit.
Nagaeaum si Berdonar nga maghimo it nagakaigo nga aksyon ro taeatapan para masolusyonan ro problema.
Samtang, gin-insister man kara nga masyado eon nga malisod kanda ro padayun nga pagtaas it presyo it langis kung siin haeos owa eon sigon sanda it mai-uli nga kita para sa andang pamilya.
