Matapos ro sunud-sunod nga pagtaas sa presyo ag sang beses nga rollback, nagpatuman eon man it oil price increase.
Nagdugang it P8.65 sa kada litro it diesel samtang P3.40 man ro patong sa kada litro it gasolina.
Nakaangkon man it pagtaas nga P9.40 sa presyo it kada litro it kerosene.
Naging epektibo ro oil price adjustment kahapon nga adlaw it martes.
May mahimo baea ro publiko? Pwede baea hambaeon nga indi anay magpa-gas ay mataas eon man ro presyo.
Mayad baea nga magpundo anay sa pagbiyahe ag ipapundo ro negosyo.
Haeos nasanay eon ro tanan nga naga-piyong eon lang samtang nga nagapa-gas.
Rason nga ro hangkat sa tanan nga mga naga-ambisyon nga makapwesto sa gobyerno nga iplastar ro inyong solusyon sa indi mapugngan nga oil price hike nga ginasundan it pagtaas sa presyo it mga baeak-eon ag serbisyo.
Bukon it puro pa-pogi, pa-epal, pa-concert, pa-selfie ag pangbola eang ro sueod it kampanya.
Kita hay iya sa seryosong sitwasyon nga samtang nakakaexperiensiya it kalisod sa tunga it pandemya hay ginadunganan man it krisis sa ibang nasyon nga nadaeahig ro atong pangabuhian.
Owa it ibang tiempo agud nga maghueag ro natungdan kundi nga makaron.
Kabay nga indi eon paghueaton ro masunod nga administrasyon.
