KALIBO, Aklan–Nagprepara it pilang ka mga aktibidad ro Bureau of Fire Protection (BFP)-Aklan kasunod it pagtapos it Fire Prevention Month makaron nga buean it Marso.
Ginpahayag ni FO3 Mark Alvin Patricio, Public Information Officer it BFP-Aklan nga nakataeana sanda nga magpatigayun it culminating activity makaron nga adlaw.
Gintugyan eon man sigon nanda sa tagsa ka mga BFP station ro responsibilidad sa igapatigayun nga aktibidad.
Ginpaathag ni FO3 Patricio nga nakasentro sa pag-edukar angot sa fire safety ro programa kamana man ro mga accomplishment sa sueod it sang buean nga obserbasyon it Fire Prevention Month.
Sa kabilugan, naging madinaeag-on suno kana ro andang kampanya apisar nga indi gihapon malikawan ro pilang insidente it sunog.
Nasayuran nga ko mga nagtaliwan nga adlaw hay may grassfire nga nagtuhaw sa bahin it Brgy. Unidos, Nabas apang madasig man nga natapna it mga bumbero.
Ginasugid nga ro nagapanguna gihapon nga rason it sunog hay ro mga electrical wire sa sueod it panimaeay ukon edipisyo.
Ro BFP-Aklan hay nakalista it 35 ka mga insidente it sunog umpisa Enero 2022.
