KALIBO, Aklan–Nag-umpisa eon makaron nga adlaw, Abril 2 ro Ramadan ukon sang buean nga pag-ayuno ukon fasting it mga Muslim.
Suno kay Abdul Karim it Aklan Islamic Jama sa banwa it Kalibo nga ro pagguwa it ginatawag nga “crescent moon” hay senyales it pag-umpisa it sang buean nga pag–ayuno.
Mas kilaea sigon raya sa tawag nga “Month of Ramadhan” it mga muslim.
Ginpahayag nga ro Ramadhan ro pinaka–sagrado nga buean sa kultura it Islam.
Tuyo sigon it pag-ayuno nga daehon ro tagipusuon ukon pagpalangga it sangka tumueu-o kay Allah ag mataw-an raya it tiempo nga maghinoesoe ag magpangayo it kapatawaran sa tanan nga mga saea nga nahimo.
Raya ro rason suno kana nga adlaw adlaw sanda nga nagasimba sa andang mosque.
Mag-eowas kara, kahigayunan man sigon ro “Ramadhan” para sa mga tumueu-o nga isipon ro mga “less fortunate” ukon Kobus nga mga igmanghud ag taw-an sanda it nagakaigo nga atensyon ag bulig.
Ro buean man it pag–ayuno hay tiempo agud nga sikwayon ro mga bisyo kapareho it adiksyon sa droga ukon pagpanigarilyo.
Sa adlaw it pag-ayuno, tanan sigon sanda nga muslim hay kinahangean nga mag fasting bukon eamang sa pagkaon, kundi maskin sa andang gina-inom , pakikipaghieawas, pakikipag chismisan ag pagsumpa.
Kinahangean nga nakasentro ro andang atensyon sa pagpangamuyo , pagbasa it Holy Qu’ran ag pagbulig sa isigkatawo.
Ro tanan nga mga unga, nabdos, mga magueang ag mga nagabiyahe hay exempted kara.
Ginapatigayon it mga Muslim ro pagtapos it Ramadhan pinaagi sa paghiwat it Eid’l Ftr.
