Paandam sa mga ginikanan ag guardian, dugangan pa ro pag-dahan sa atong mga unga kontra sa online sexual exploitation.
Angot raya sa report nga naga-abot sa 134 nga mga unga nga biktima ro na-rescue it Philippine Internet Crimes Against Children Center (PICACC) samtang kapin sa 15 offenders man ro naaresto umpisa Pebrero 2021 hasta Marso 4 it makaron nga dag-on.
Sa unang dag-on umpisa nga maitukod ro ahensiya, kapin sa 154 nga nasalbar nga mga biktima ag 48 nga sexual offenders ro napasabat sa laye sa ginlunsar nga 52 nga operasyon umpisa ko Pebrero 27, 2019 hasta Pebrero 26, 2020.
Kabilugan nga 238 victims man ro na-rescue samtang kapin sa 50 nga offenders ro naaresto umpisa Pebrero 2020 hasta Pebrero 2021.
Ro nasambit nga numero hay sigurado nga padayun nga madugangan bangud nga haeos adlaw adlaw hay may napabalitang kaso it ‘online bugaw’ nga ro ginabaligya hay puro mga menor-de-edad.
Grabe ro gina obra nga pag engganyo sa mga unga nga magbaligya it kaugalingon kabaylo it kwarta ukon gadgets.
Rason nga ro padumdum sa mga ginikanan , pirmeng istoryahon ro unga , sayuron ro anang mga ginakasakuaan ag mga gina-istorya eabi eon sa social media.
Raya ro ginagamit it mga bugaw nga pamaagi agud nga makapangbiktima.
Paga-utu-on ro unga ag pagapromisahan hasta nga mahueog sa bitag ag maeakip sa mga ginabugaw online.
Nagaeaum man kita nga mas nga pagapabaskugon ag pagapaeaparon pa it gobyerno ro pagsukoe sa makarondaya nga pagpang-abuso.
Nasayuran naton nga maabu nga ginapangatubang nga problema makaron apang kabay nga indi pagpabay-an ro aton nga mga unga, ro pamatan-on.
Dahanan naton sanda ag ipaeayo sa anuman nga paeag it kaeainan.
