KALIBO, Aklan–Sigidas ro pagpatigayon it maeapnagon nga protesta it mga pomoeuyo sa Sri Lanka agud nga patalsikon sa puwesto ro andang Presidente.
Suno kay Bombo International Correspondent Zenny Verdillo Gadut it Sri Lanka nga haeos adlaw-adlaw hay nagatumpok-tumpok ro mga mabaho-ean nga grupo it protesters sa may bahin it Colombo, ro pinakasentro nga siyudad it nasyon agud nga magprotesta sa andang gobyerno bangud sa naexperiensiyahan nga grabe nga pagtinaas it mga baeak-eon.
Grabe sigon ro naging epekto sa mga pomoueyo matapos nga nagmahae ro presyo it mga produktong petrolyo , milk powder ag iba pang nga basic commodities.
Bangud kara hay maabo eun man sigon sa mga pomoeuyo ro nag-eaha gamit ro uling.
Samtang, pigado man sigon makarun ro nagasueod nga dollar sa nasambitan nga nasyon.
Bangud man sa nabatyagan nga economic crisis hay boluntaryong nagbuhi sa andang puwesto ro tanan nga mga cabinet members.
Owa man sigon nagpaguwa it anuman nga pahayag ro mga cabinet members may kaangtanan sa andang pag-resign sa puwesto.
Sa pihak nga parte ginpaabot man ni Gadut sa mga indibidwal nga may pamilya nga nagatrabaho sa Sri Lank nga owa sanda it dapat mga kabaeak-an bangud euwas ag owa it may nahalitan idto nga mga Pinoy.
Gina-engganyo man sigon nanda ro mga Pinoy idto nga indi magpartisipar sa mga nagakatabong hub-eag protesta agud nga indi madaeahig sa kinagamo.
