KALIBO, Aklan–Ginapahauman eon it barangay council it Tigayo, Kalibo ro igakasa nga seguridad sa ginaeauman nga pagbuhos it mga turista ag pilgrims sa Bukid Tigayon.
Raya hay matapos nga uman nga buksan ro nasambit nga lugar para sa Semana Santa.
Suno kay Punong Barangay Gil Morandante it Tigayon, Kalibo nga kaibahan sa andang preparasyon hay ro pagtaeana it one-way nga aeagyan agud nga mapatuman ro physical distancing ag mabantayan ro mga owa nagasuksok it face mask kamana man ro parking area.
Apang iga-finalize pa sigon ro mga plano sa Lunes nga adlaw kaibahan ro LGU-Kalibo.
Magiging kabulig suno kana it andang barangay tanod ro mga pulis nga iga-deploy ag miyembro it MDRRMO-Kalibo.
Nasayuran nga ro Bukid Tigayon hay kaeabanan nga ginadayo kada Huwebes ag Biyernes Santo agud nga magpatigayon it via crucis, kun sa siin pag-abot sa ibabaw hay makita ro viewing deck ag chapel.
Angot kara, hugut ro panawagan ni kapitan morandante sa publiko nga pabaskugon ro pagsunod sa health protocols.
Maskin suno kana nga naganami eon ro kahimtangan it pandemya hay indi gihapon dapat nga maging kampante ro publiko.
