KALIBO, Aklan–Nakabatyag eun it krisis ro pilang ka mga bulantero sa Kalibo Public Market.
Suno sa sangka tindero nga si Siping Sonio ag tumandok it Brgy. Pampango, Libacao, haeos maigo eun lang nga ibayad sa ticket ro andang kita matapos nga patag-uran ro oras it andang pagbaligya sa nasambitan nga merkado publiko.
Sa makarun hay ginataw-an eamang sanda it hasta alas 4:30 sa agahon nga pagbaligya.
Apang bangud masyado pa sigon nga timprano ro nasambitan nga oras hay owa gid kanda it may nagabakae.
Dugang pa kara nga maskin may tawo man nga naga-aeabutan sa tindahan hay indi eun sanda mabak-ean pa bangud ginabawaean eun man nga maghathat it andang prudokto pagpatak it alas-4.
Samtang magiging pabor man sigon kanda nga mga bolantero kung magpabilin eamang una sa prenti it kalibo public market ag indi eun pag isaylo pa sa ibang lugar.
Nagahinyo man sanda it mas mahaba pa nga oras ukon hasta alas-6 nga pagpabaligya agud maskin paalin hay makaangkon man sangkiri nga kita.
