KALIBO, Aklan–Nakataeana nga mag-adto hin-aga ro mga representante it Land Transportation Office (LTO) Region 6 sa banwa it Kalibo para magtao it libreng serbisyo para sa mga Public Utility Vehicle (PUV) driver nga gustong mag-renew it lisensya.
Raya hay kasunod it Integrated Sustainable Assistance for Recovery and Advancement Program (I-SARAP) it nasambit nga ahensya.
Suno kay Atty. Gaudioso Geduspan II, Assistant Regional Director it LTO-6 nga maga-umpisa ro andang serbisyo pasado alas-8:00 hin-aga it agahon sa ABL Sports Complex.
Tuyo sigon kara nga buligan ro mga indibidwal nga nagabuyot it driver’s license nga magaexpire eon sa sueod it sang dag-on para makahimo it account sa portal it Land Transportation Management System agud nga sanda ro maka-access sa online nga Comprehensive Driver’s Education ukon CDE nga magapaidaeom man sa validation exam sa mismong venue.
Ro CDE suno kana hay kapareho it refresher course nga requirement agud nga makarenew it driver’s license halin sa 5-year validity paadto sa 10-year validity.
Base sa sueondanan, sarang nag makarenew it lisensya ro sangka indibdiwal 60 diyas antes raya mag-expire samtang ro CDE hay sarang mapatigayon sang dag-on antes ro expiration agud nga maisyuhan it driver’s license nga valid it napueong dag-on.
