KALIBO, Aklan–Gindagsa it mga Kristiyano ro ginpatigayun nga misa ni Pope Francis sa St. Peter’s Square kadungan it pagselebrar it Easter Sunday ukon uman nga pagkabanhaw ni Hesus.
Suno kay Bombo International Correspondent Girlie Ongoco it Rome, Italy nga maabu nga mga pumueoyo ag turista ro nagtambong sa misa it Santo Papa nga nag-umpisa it alas-9:00 it agahon hasta alas-12:00 it udtro adlaw.
Nakasentro sigon ro homiliya it Santo Papa sa resurrection ni Hesus kung siin latin ro gingamit kara nga lenggwahe.
Ginpahayag pa ni Ongoco nga may pilang tradisyon nga ginahimo ro mga Italyano kada Easter Sunday partikular ro pagkaon it bacon kung agahon ag pagkaon sa mga restaurant pag-abot it truadlaw ukon gabi-i.
May pila man sigon nga naga-adtu sa baybayon bitbit ro chocolate eggs para itao sa andang kaparyentehan ag kaabyanan.
Sa pihak kara, makabig suno kana nga normal ukon ordinaryo nga adlaw eamang ro Easter Sunday sa Italy.
Maskin ro ginapatigayun nga procession hay bukon it magarbo kumpara sa Pilipinas nga ginapasakupan it linibo nga katawo sa kada lugar.
