KALIBO, Aklan–Naga-abot sa 160 hectares ro kaeapad it mga tinuean-on nga nasamad sa banwa it Kalibo matapos ro pagtama it bagyong Agaton.
Suno kay Municipal Agricultural Officer Uriel Las Piñas nga maskin owa nakaangkon it pagtaas sa lebel it tubi sa mga kasubaan, naging mabahoe nga hangkat man para sa mga mangunguma ro sigidas nga pagbubu it mabaskog nga uean kung siin nagtuga pa it pagbaha sa pilang ka mga barangay.
Raya sigon ro rason kung ham-an napuno it tubi ro kaabuan sa mga kaeanasan.
Base sa inisyal nga datus it Municipal Agricultural Office, kapin sa P24 million ro naging kahalitan sa mga nasamad nga tinuea ag masobra P3 million sa pakwan ag melon.
Samtang, may pilang katangkehan man sigon ro nag-awas kung siin nakalista sanda it haeos P600,000 nga damaged.
Sa makaron hay nagapadayun pa ro andang pagtipon it damaged assessment report halin sa mga kabarangayan para masayuran ro kabilugan nga kahalitan it bagyo.
