KALIBO, Aklan–Nagapadayun pa ro search and rescue operation it Philippine Coast Guard (PCG)-Caticlan angot sa naduea nga sangka mangingisda sa kaeawran nga sakop it isla it Boracay ko gabi-i it Lunes, Abril 18.
Nakilaea ro biktima nga si Jose Ocson Flores, 57-anyos, resiente it Brgy. Balusbos, Malay.
Ginpahayag ni Chief Petty Officer Dominator Salvino, Deputy Station Commander for Operation it PCG-Caticlan nga nakita it sambilog pang mangingisda nga nakilaea kay Jeffrey Tumulak si Flores nga nahueog sa ginasakyan nga baroto ag nagapangayo it bulig.
Haeos 200 metro sigon ro distansya it daywa sa kada isaea rason nga madasig nga nagpaeapit si Tumulak sa baroto it biktima apang owa eon nana raya nakita.
Indi pa matumod it mga otoridad ro rason it pagkaduea ni Flores apang ginapanan-aw man nanda ro posibilidad nga gin-atake raya it anang baeatian.
Nagpanawagan man si Salvino sa mga pumueoyo nga inisgidang makipag-angot kanda engkaso nga may mapan-uhan nga persona maeapit sa pangpang ukon baybayon.
