KALIBO, Aklan–Nagapanawagan ro mga mangingisda sa probinsiya it Aklan nga itau eon kanda ro fuel subsidy tuga it padayun nga pagtaas it presyo it produktong petrolyo.
Suno kay mrs. Lucella Tayco, sambilog sa nagapanag-iya it barotong pangisda sa parte it New Buswang, Kalibo nga nagadugang ro mataas nga presyo it produktong petrolyo sa paeas-anon it mga mangingisda.
Naka-rehistro sigon ro andang mga baroto sa bureau of fishieries and aquatic resources ukon BFAR.
Ro dati sigon nga 2,000 pesos nga kapital hay haeos 5,000 pesos eon bangud sa mataas nga presyo it krudo ag gasolina nga nagahampang ro presyo sa masobra sa 80 pesos kada litro.
Nagpaabot man it kaparehong sentimiento ro sambilog pang tag-ana it baroto nga si Mrs. Buena Fe Sabino, residente man it nasambit nga lugar.
Suno kana nga nagapabilin pa it pilang adlaw sa eawod ro anang mga unga agud nga makabawi sa andang kapital ukon ginatawag nanda nga “starting”.
Agud nga mabawasan ro epekto kara sa andang linyada, dapat eon suno kana nga itau it gobyerno ro subsidiya ag indi eon pagahaluan it politika.
Ginsaysay man ni Mrs. Erlinda Gepty nga grabeng kalisod eon ro andang naexperiensiyahan umpisa nga makaangkon it sunud-sunod nga bigtime oil price hike.
Nalisdan eon sigon sanda nga maka survive matapos nga owa pa masyadong makabangon sa epekto it COVID-19 pandemic.
