KALIBO, Aklan–Padayun nga naka-alerto ro Civil Aviation Authority of the Philippines ukon CAAP-Aklan sa atubang it pagbuhos it mga pasahero eabi eon ro mga bakasyunista nga paagto sa isla it Boracay.
Suno kay Engr. Eusebio Monserate Jr., Manager it CAAP-Aklan nga umpisa ko Abril 1, maabu nga mga airline companies ro nagpa-abiso agud nga makaangkon it dugang nga numero it andang biyahe sa Kalibo International Airport.
Mag-eowas kara, plano nanda nga buksan it uman ro andang night flights agud nga mabaton it iba pang mga flights nga gustong mag-operate sa paeuparan eabi eon sa gabi-e.
Sa baylo suno kana nga alas-6 it agahon hasta alas 6 it gabi-e nga operasyon, plano nanda nga paeawigon raya hasta alas-10 it gabi-e.
Sa kamatuoran suno kana hay maabu eon nga international aviation player ro gusto eon nga magbalik sa KIA partikular ro Korean floghts, apang mabahoe nga sabeag sigon ro mga requirements ukon health protocols nga ginapatuman sa pagbalik nanda sa andang nasyon.
Ginkumpirma pa ni Engr Monserate nga naga-average sanda makaron sa limang flights kada adlaw, kun sa siin haeos punuan ro eroplano it mga pasahero.
Maabu pa sigon nga mga bakasyunista ro ginaeauman sa masunod nga mga inadlaw.
Sa pihak nga parte, gindugang pa ni Engr Monserate nga maskin sanda hay nakibot sa pagdagsa it mga pasahero ko Semana Santa.
Mag-eowas sa mga commercial fligfhts hay may una pang chartered plane.
Sa pihak kara, naging maayos sigon ro sitwasyon ag owa it anuman nga problemang nailista.
Instrikto suno kana ro andang implementasyon it security program sa airport kabulig ro special operations unit ukon PNP avsegroup.
