KALIBO, Aklan–Pormal eon nga ginbuksan it gobyerno probinsyal ro 22nd Aklan Piña and Fiber Festival sa Trade Hall, Capitol Grounds Kalibo makaron nga adlaw it Biyernes, Abril 22.
Raya hay matapos nga mapaiway ro provincial trade fair it haeos tatlong dag-on kasunod it pagpanaeasa it COVID-19 pandemic.
Ro opening it trade fair hay ginpangunahan it Department of Trade and Industry (DTI)-Aklan kaibahan ro iba pang partners nga ginakaeakipan it Philippine Fiber Industry Development Authority, DENR, TESDA, DOST, Philippine Information Agency ag maabu nga iba pa.
Nasayuran nga naga-abot sa 70 nga mga exhibitors ro nagpasakop sa Aklan Piña and Fiber Festival makaron nga dag-on.
Suno kay Aklan Governor Florencio Miraflores, raya eon ro pinakamabahoe nga numero it mga partisipante nga nagpasakop umpisa nga gintukod ro trade fair.
Nagaeaum sigon imaw nga magpadayun ro aktibidad hasta sa masunod nga mga henerasyon.
Sa pihak nga parte, ginpaathag ni Ms. Carmen Iturralde, Provincial Director it DTI-Aklan nga sambilog sa katuyuan it programa hay mabuligan ro mga Micro, Small and Medium Enterprises (MSMEs) nga makabangon halin sa epekto it pandemya.
Target sigon nanda nga maka-generate it P5 million nga sales makaron nga dag-on.
Gin-engganyo man ni Iturralde ro mga pumueoyo nga magbisita sa Trade Hall para makapili ukon makabakae it nagkaeain-eain nga produkto nga himo sa piña ag abaca nga may manami nga kalidad ag sarang nga ipabugae.
