KALIBO, Aklan–Haeos 95 porsyento eon nga haum ro Commission on Elections (Comelec)-Aklan para sa May 9, 2022 national and local elections.
Ginpahayag ni Atty. Reinier Leyson, Acting Provincial Election Supervisor it Comelec-Aklan nga ginplastar eon nanda kahapon sa ginhiwat nga Provincial Joint Security Control Center Meeting kaibahan ro Philippine National Police ag Armed Forces of the Philippines ro andang deployment plans, mga aktibidad ag tanan nga preparasyon para sa nagahilapit nga eleksyon.
Maskin sigon ro mga manugturo nga magaserbing electoral board ag ro pilang technical support staffs hay ginpaidaeom eon sa training.
Ginahueat eon lang sigon nanda makaron nga matapos ro refresher training it mga electoral board members ag iba pang poll worker.
Kumpiyansa si Atty. Leyson nga haum eon ro mga voting centers sa bilog nga probinsya matapos ro ginpatigayun nga syento porsyento nga ocular inspection.
Nasayuran nga kapin sa 694 ro numero it mga Vote Counting Machine (VCM) nga gintaeana para sa probinsya it Aklan ag nakataeana nga iga-deploy sa 17 kabanwahanan umpisa Abril 29 hasta 30.
Ro tanan nga mga official ballot suno kana hay ginaeauman nga mag-abot sa Abril 27 kung siin iga-diretso raya sa tagsa-tagsa nga mga Office of the Municipal Treasurer.
Samtang, nakataeana man nga magpatigayun it final testing it VCM sa Mayo 7 ro komisyon bilang preparasyon sa mismong adlaw it eleksyon.
