KALIBO, Aklan–Sigidas makaron ro pagpanupod it Department of Social Welfare and Development (DSWD)-6 it family food packs sa mga lokal nga gobyerno nga naapektuhan it pagtama it bagyong Agaton sa bilog nga Western Visayas.
Suno kay May Castillo, Public Information Officer it DSWD-6 nga mag-euwas sa relief packs hay may igatao man sanda nga financial assistance sa kada pamilya nga apektado it bagyo.
Base sa inisyal nga listahan it taeatapan, kapin sa 116 barangay sa Aklan ro naapektuhan it bagyo kung siin katumbas raya it 16,475 nga pamilya ukon 59,359 nga inidbidwal.
Ginasugid nga naga-abot sa masobra 317,000 nga pamilya ro nakataeana nga magbaton it bulig-pinansyal sa oras nga matapos eon it download ro P37.9 million nga pondo.
Ro kada benepisyaryo sigon hay sarang makabaton it P3,000 nga cash assistance mag-euwas sa taga-Pontevedra, Capiz nga nakabaton it P5,000.
Sa makaron, naga-abot eon sa 56,498 family food packs ro gin-release it DSWD sa bilog nga rehiyon nga nagabalor it P27.9 million.
