KALIBO, Aklan–Naging madinaeag-on ro ginpatigayun nga awarding ceremony it gobyerno probinsyal para sa mga Most Outsanding Tax Payer ag Most Outstanding Municipal Treasurer’s Office nga kaparte it selebrasyon it Aklan Day.
Suno kay Provincial Treasurer Bernardino Villaruel, importante nga mataw-an it pagkilaea ro mga tax payer bangud mabahoe ro andang kontribusyon sa pagsueong it ekonomiya.
Raya sigon hay dag-unan nanda nga ginapatigayun apang temporaryong napaiway sa nagtaliwan nga daywang dag-on sa tunga it pagpanaeasa it pandemya.
Sambilog sigon sa nakabulig sa pondo it probinsya sa kasagsagan it COVID-19 pandemic hay ro mga nakolektang buwis halin sa Real Property Tax.
Nasayuran nga nagabalor it P2.4 billion ro pondo makaron nga dag-on it probinsya.
Ro pinakamabahoe nga naka-contribute kara hay ro nakolektang buwis sa Jetty Port kasunod it amat-amat nga pagbuhos it mga turista.
Sa kamatuoran suno kana, naga-abot eon sa masobra P69.8 million ro kinita it Caticlan and Boracay Terminal Building and Jetty Port umpisa Enero hasta Abril 2022.
Nagaeaum si Villaruel nga maging tayuyon ro paghaeuga it restriction agud nga eubusan nga makabangon ro ekonomiya halin sa maeapnagon nga epekto it pandemya.
