KALIBO, Aklan–Maabu nga mga pumueoyong Aklanon ro nagpamati ag nagtan-aw sa ginpatigayun nga “Pili Akean” political forum it Kapisanan ng mga Brodkasters ng Pilipinas (KBP)-Aklan Chapter para sa mga kandidato nga nagapadaeagan sa provincial level makaron nga adlaw, Abril 29 sa ABL sports and cultural complex.
Sa forum, ginplastar it mga kandidato sa pagka-kongresista, gobernador, bise gobernador ag mga board member halin sa una ag ikaywang distrito it probinsya ro andang plataporma de gobyerno.
Ginkalitan man it mga kandidato ro kahigayunan para mabatian it maabu nga pumueoyo ro andang plano sa masunod nga tatlong dag-on engkaso nga magdaog sa May 9, 2022 elections.
Agud nga masiguro ro kaeuwasan it mga kandidato ag mga tumaean-aw, nagpatuman it hugut nga pagbantay ro mga otoridad sa palibot it pasilidad.
Maskin ro strikto nga pagsunod sa health and safety protocols hay hugut man nga gin-implementar.
Samtang, ginpasaeamatan man ni KBP-Aklan Chapter Chairman Apolonio Zaraspe ro pagsakdag it mga kandidato sa andang imbitasyon.
Pinaagi sigon sa rayang forum hay mas maklaruhan ro mga pumueoyo kung sin-o ro angay ag bagay nga ibutang sa pwesto.
