KALIBO, Aklan–Nagpaandam ro sangka election watchdog group kontra sa nagkaeain-eain nga klase it pagpangloko sa eleksyon kasunod it nakataeana nga pagboto it publiko sa Lunes, Mayo 9 para sa national ag local candidates.
Ginpaathag ni Reverend Father Marco Sulayao, tagapaghambae it Kontra Daya-Western Visayas nga dapat nga magbantay, maghanda ag maghueag ro publiko sa anuman nga iregularidad nga matabu.
Kaibahan suno kana sa andang ginapatutukan hay ro disinformation campaign ukon pagpakalhit it fake news, vote-buying ag red tagging nga igalunsar it mga kandidato nga gustong magpamentaha sa maabot nga eleksyon.
Ginpahayag pa kara nga may pila eon sanda nga nabaton nga mga impormasyon angot sa mga insidente it pagpamakae it boto sa Western Visayas apang raya hay padayun pa nanda nga gina-beripika.
Nag apela man imaw nga boe-an it litrato ukon video footage ro anuman nga makadueuda nga hitabu ag ipadaea kanda agud nga maipaabot sa natungdan.
Pwede sigon nga makipag-angot sa andang website nga kontradaya.org ukon sa FB page nga kontra.daya.
Kinahangean suno kana nga mag-monitor ro tanan partikular ro mga maeain nga hilimuon antes ukon sa mismong adlaw it eleksyon.
Gindugang pa ni Fr. Sulayao nga ro boto hay sagrado nga kinahangean nga mabantayan.
Nagpanindugan ro kontra-daya nga indi eon dapat nga mauman ro mga kapalpakan nga natabu ko 2019 nga eleksyon, kun sa siin hasta sa makaron hay owa pa napaathag it comelec ro natabu nga haeos pitong oras nga glitch ukon delay sa pag-transmit it resulta.
Masyadong sigon nga naging kontrobersiyal ro resulta eabi eon sa parte it mga nagdaog nga senador.
