KALIBO, Aklan–Ginpatigayon ro final testing ag sealing sa mga vote counting machine ukon VCMs nga pagagamiton sa eleksiyon it Commission on Elections ukon Comelec sa bilog nga probinsiya it Aklan.
Sa Kalibo pilot elemtary school, ginsaksihan it mga tawuhan it comelec ro pagpatigayon it final testing ag sealing nga owa nakalista it anuman nga aberya.
Ginpakita kara it mga electoral board it komisyon ro pagbukas it VCM halin sa kahon, pag-check sa mga component kara kapareho it cable, battery, thermal paper, ag iba pa.
Pagkatapos kara, nakaangkon it end-to-end test, halin sa initialization it mga VCM, pagboto it pilang mga tawo, hasta sa pagsalang it mga accomplished ballot sa VCMs ag pag-imprenta it election returns.
Ginpaathag ni Chrispin Raymund Gerardo, tagapaghambae it comelec-aklan nga ro nasambit nga tikang hay sandig sa Resolution 9981 nga nagatuyo nga masiguro nga ro mga makina hay nagagana ag una sa maayos nga kondisyon antes ro eleksyon.
Indi sigon mapatigayon ro eleksyon kon owa it final testing ag sealing.
Matapos ro testing, ro mga VCM hay gin-selyuhan ag ginkandado sa mga natungdan nga polling precint.
Raya sigon hay pagabantayan it mga katapo it kapulisan.
Uman raya nga paga buksan sa adlaw it eleksyon sa Lunes, Mayo 9 alas-5 it agahon.
Natigayon eon nga mai-deliver ro tanan nga mga VCM sa bilog nga probinsiya.
Ginduea man ni Gerardo ro pagkabaeaka it publiko engkaso nga masamad ro VCM bangud nga may gintaeana sigon sanda nga technician ag may mga reserba.
Sa pihak nga parte, ginlaygayan ni Gerardo ro publiko nga temprano nga mag-boto.
Ag agud nga mapadasig ro pagboto, magdaea it kodigo ag sayuron eagi ro natungdan nga polling precincts.
Pwede man sigon nga asisteran ro mga senior citizens.
Mag-eowas sa pagsuksok it face mask, gin-abisuhan nana ro mga botante nga likawan nga makipag-maritess bangud sa padayun nga paeag it COVID 19.
