KALIBO, Aklan–Bukas ro Aklan Agri-Aqua Demonstration Farm and Training Center nga nahamtang sa Barangay Nalook, Kalibo sa mga gustong magbakae fingerlings para sa andang tilapia farming.
Suno kay Sherlyn Placio Dela Cruz, sambilog sa hatchery staff nga antes nga makabakae hay kinahangean nga magtau anay it sample it tubi agud nga matumod kon pasado sa andang water standard ukon salinity it tubi nga paga-alagaan it tilapia kamana man ro area it tangke.
Ro 2-weeks old nga semilya ukon No. 17 hay nagabalor sigon it 30 sentimos apang ro fingerlings nga mataas eon ro survival rate hay tig-piso ro sambilog.
Sa kamatuoran sigon hay ginakueang sanda it supply bangud sa mga walk-in ag direct buyers, apang indi man basta-basta nga mataw-an bangud nga kinahangean nga magpa-reserve anay.
Sa mga interesado nga mag-avail it libreng mga semilya, dapat nga magsueat anay sa provincial government nga naka address sa office of the governor ag maga-agi pa sa office of the provincial agrictulturists antes nga magaderetso sa hatchery.
Ginasunod sigon nanda ro proseso agud nga malikawan nga mauyang ukon mamatay ro mga ginabakae nga semilya.
May mga taga Antique, Capiz ag iba pang kaiping nga probinsiya ro naga-inquire kanda angot sa andang produksyon.
Ro andang tilapia sigon hay may manami nga kalidad nga nagabahoe ro kada sambilog it tig-sang kilo.
Samtang, ginatun-an eon sigon nanda ro pantat ukon hito culture.
