KALIBO, Aklan–Dapat nga masayuran it mga Filipino ro kahueogan ag importansya it pagselebrar it Independence Day sa nasyon kada Hunyo 12.
Raya ro ginpahayag it sangka batikan nga abogado sa probinsya it Aklan nga si Atty. Plaridel Morania.
Suno kana, kinahang-ean masayuran it kada pumueoyo nga ro kahilwayan nga gina-angkon makaron it Pilipinas hay ginbuwisan it kabuhi it mga baganihan.
Raya hay matapos nga masakop ro nasyon it Espansya sa sueod it mahaba nga panyempo ukon 333 anyos.
Ro makasaysayang pagpahayag it adlaw it kahilwayan it Pilipinas hay nataw-an it katumanan ko Hunyo 12, 1898 kung siin gindeklara ni Heneral Emilio Aguinaldo ro pagiging independent it nasyon halin sa pagpang-sakop it Espanya matapos raya nga mapyerdi sa natabo nga giyera sa Manila Bay sa tunga it Amerika.
Apisar nga gina-selebrar it Pilipinas ro adlaw it Kahilwayan kada Hunyo 12, ro ginasugid nga matuod kara nga kahilwayan hay ginkilaea eamang it Estados Unidos ko Hulyo 4, 1946.
Halin kato, ro nasambit nga adlaw hay gina-slebrar eon kada Hulyo 4 aeang-aeang sa nasyonalismo.
Ro Republic Act No. 4166 hay ginpirmahan agud nga maging laye ni Pangueong Diosdado Macapagal ko 1964.
Nakabaehag sa nasambit nga laye nga ro petsang Hunyo 12, halin pa sa tyempong ginakilaea raya bilang adlaw it bandera hay imaw man ro adlaw it kahilwayan.
