KALIBO, Aklan–Ginreport it Philippine Coast Guard nga owa it ibang nailistang maritime incident sa selebrasyon it kapiestahan ni San Juan De Bautista mag-eowas sa natabu nga pagkueob it daywang baroto sa kaeawran nga sakop it Brgy. Tambak, New Washington.
Suno kay senior chief petty officer Dominador Salvino, deputy station commander for operations it PCG-Aklan insigida man nga naka-responde ro andang mga tawuhan nga nakadeploy sa lugar kaibahan ro iba pang natungdan nga ahensiya it gobyerno rason nga insigidang natabangan ro mga biktima.
Samtang, sa western side it probinsiya kaibahan ro isla it Boracay hay owa sanda it naging problema.
Nagsunod man sigon ro mga beachgoers ag sa mga nagapatigayon it water sports activities sa andang abiso nga magdahan ag maging alerto sa tanan nga kahigayunan agud nga makalikaw sa aksidente.
Apang sangka eaeaki suno kana ro nailistang namatay tuga it pagkaeumos sa banwa it New Washington.
Sa pihak nga parte, gindugang pa ni Salvino nga base sa andang monitoring, sangkiri makaron ro numero it mga beachgoers eabi eon sa isla it boracay kumpara ko nagtaliwan nga holy week.
Posible suno kana nga maabu pa nga mga pumueuyu ro nagadahan kontra sa covid 19.
Mag-eowas sa seaborne patrol, may pilang tawuhan man it PCG ro nagpatigayon it foot patrol sa mga shoreline.
