KALIBO, Aklan–Naga-abot sa kabilugan nga 27,851 ro mga benepisyaryo it Pantawid Pamilyang Pilipino Program (4Ps) sa bilog nga probinsya it Aklan.
Suno kay Beverly Salazar, Provincial League it 4Ps nga kaibahan eon kara ro 646 nga mga Indigenous People halin sa Libacao, Madalag ag Malay.
Ro listahan sigon it 4Ps beneficiaries hay halin sa LISTAHANAN.
Posible sigon nga madugangan pa ro numero it mga benepisyaryo sa oras nga magguwa eon resulta it pinaka-ulihing survey nga ginpatigayun ko 2019.
Sa pihak nga parte, ginkumpirma man ni Salazar nga padayun sanda nga nakakabaton it reklamo angot sa pagprenda it cash card it pilang benepisyaryo.
Ro masami sigon nanda nga gina-ubra nanda hay ginapatawag ukon personal nga ginabisitahan ro natungdan nga benepisyaryo para warningan ag ipaidaeom sa counseling.
Hasta eamang sigon it daywang warning ro andang ginatao ag pag-abot it pangatlo hay pagakakason eon sa listahan ro pasaway nga 4Ps beneficiaries.
Kaeabanan sigon nga rason sa pagprenda it cash card hay gingamit sa emerhensiya ag ginbakae it pagkaon.
Apang, owa sigon nanda raya gina-tolerar agud nga indi eon pagtuearon it iba pa.
