KALIBO, Aklan–Nagpanindugan si United Kingdom Prime Minister Boris Johnson nga magapabilin gihapon raya sa pwesto sa pihak it anunsyo nga maga-resign hasta nga owa pa it mapili ro leader it conservative nga maga-baylo kana.
Raya ro ginpahayag ni Bombo International Correspondent Ramil Isogon it United Kingdom.
Matueopangdan nga masobra 50 ka mga miyembro it gabinete ni Johnson ro nagpanaog sa pwesto bangud sa kawad-an it kumpiyansa sa anang pagdumaea.
Raya hay kasunod it ginakaeakipan nga mga kontrobersiya it Prime Minister eabi eon ro pag-eabag sa ginapatuman nga lockdown sa kasagsagan it COVID-19 pandemic.
Suno kay Isogon, kapin sa 11 ka mga aspirante eon ro nagpahayag it kagustuhan nga maging masunod nga Prime Minister.
Ro mga raya sigon hay halin sa conservative members of parliament.
Ginaeauman nga maga-umpisa ro proseso sa pagpili it bag-ong lider sa masunod nga dominggo.
Si Johnson ro ginakabig nga may pinakamatag-od nga termino bilang Prime Minister sa kasaysayan it United Kingdom.
