KALIBO, Aklan–Ginkalipay it Bureau of Fire Protection (BFP)-Kalibo ro positibo nga sabat ni Mayor Juris Bautista-Sucro angot sa andang request nga makaangkon it ambulansya ag dugang nga fire truck.
Suno kay SFO1 Paulo Vicente Neptuno, Deputy Fire Marshall, OIC for Operations it BFP-Kalibo nga naging manami ro resulta it ginpatigayun nanda nga courtesy call sa opisina it alkalde.
Dikara sigon ginplastar ni Municipal Fire Marshall Arden Bedoña ro tanan nga programa ag kinahang-eanon it taeatapan.
Ginpangayuan eamang sigon sanda it pormal nga sueat para sa nasambit nga request.
Suno kay Neptuno nga kaeabanan sa andang ginagamit nga fire truck hay may kalumaan eon rason nga kinahang-ean it dugang nga behikulo para mas pang mapanami ro andang serbisyo.
Gin-insister man kara nga kinahang-ean nanda nga makaangkon it ambulansya nga pwedeng maggamit sa pagresponde sa mga aksidente ukon medical responses.
Sa makaron, fire truck sigon ro andang ginagamit kung siin indi man pwedeng maikarga ro mga biktima.
Mag-euwas kara, kinahang-ean man sigon nanda it dugang nga fire aids.
Mabahoe sigon ro bulig it nasambit nga indibidwal sa andang operasyon eabi eon kung may gina-respondehan.
