KALIBO, Aklan–Nakalista ro New York City it madasig nga pagtaas it kaso it monkeypox virus.
Suno kay Bombo International Correspondent Greg Aguilar it California, USA nga base sa pinakaulihing datus, naga-abot eon sa 267 ro kaso it monkeypox sa New York.
Kaabuan sigon sa mga pasyente hay owa nagpadaea sa ospital ag mas ginpili nga magpabilin sa andang baeay.
Ro mga nabatyagan sigon nga sintomas it mga nasambit nga pasyente hay masakit nga rashes ag sores.
Kaeabanan sigon nga nailista ro kaso it monkeypox sa mga bading ag bisexual.
Agud nga malikawan ro mas pang pagkalhit it virus, nag-umpisa eon sigon ro distribusyon it monkeypox vaccine apang limitado eamang ro suplay.
Raya sigon hay ginatao eamang sa mga lugar nga may mataas nga kaso.
Ro 2 dose vaccine hay ginatao sa mga naga-edad 18-anyos pataas.
Samtang, ginlaygayan man ro mga bading ag bisexual sa Amerika nga likawan ro pakikipaghieawas sa multiple partner para malikawan ro pagtaeapnan it monkeypox.
